Logi Ólafsson hress eftir leikinn í dag.
,,Menn eru verulega sáttir og ánægðir með þetta," sagði Logi Ólafsson eftir að Selfyssingar tryggðu sér sæti í Pepsi-deildinni að ári með 3-1 sigri á ÍR í dag.
Lestu um leikinn: ÍR 1 - 3 Selfoss
,,Þið hafið verið duglegir við það að finna hverjir aðrir hafa átt möguleika á að fara upp um deild. Ég held að það hafi hreinlega hjálpað okkur og létt pressu af mönnum. Menn hafa lent í því að lenda undir í þrígang eins og gegn Ísafirði og koma síðan til baka og skora sigurmarkið. Ég held að hópurinn sé til í allt saman, við erum búnir að vera í 2. sæti frá því einhverntímann í júní."
Logi býst við að halda sjálfur áfram með liðið en verð miklar breytingar á leikmannahópnum?
,,Það eru menn sem þarf að semja við aftur og síðan eru aðrir með lengri samning eins og gengur og gerist."
Selfyssingar styrktu sig með því að fá erlenda leikmenn fyrir tímabilið og í júlí bættust þrír leikmenn við hópinn, Ingólfur Þórarinsson, Peter Klancar og Ivar Skjerve.
,,Það var nauðsynlegt að ná í þessa menn því erum týndir í leikbönn vegna gulra spjalda og það eru 2-3 í banni hjá okkur í hverjum einasta leik," sagði Logi en Selfyssingar fengu sex gul spjöld í leiknum í dag.
,,Mér fannst þau vera full léttvæg. Mér finnst Vilhjálmur (Alvar Þórarinsson) vera góður dómari og Oddbergur (Eiríksson) vera fyrirmyndaraðstoðardómari en mér finnst stundum eins og það sé verið að flagga þessum gulu spjöldum alltof mikið. Það kann ekki góðri lukku að stýra ef að þú ætlar að stjórna leik með spjöldum. Þá er þetta orðið heil bók í lokin," sagði Logi léttur í bragði að lokum.
Hér að ofan má sjá viðtalið í heild sinni.
