Tíu leikjum var rétt í þessu að ljúka í ensku Championship deildinni. Fyrr í dag vann Aston Villa sinn tíunda sigur þegar liðið vann Millwall 1-0. Klukkan 16:15 hefst leikur Brentford og Leeds sem verður í beinni útsendingu hjá Stöð 2 Sport. Patrik Snær Gunnarsson er á bekknum hjá Brentford.

Topplið deildarinnar Norwich gerði 2-2 jafntefli gegn Stoke á útivelli. Norwich komst tvisvar sinnum yfir en heimamenn svöruðu í bæði skiptin. Þá tryggði WBA sig inn í umspilið með 0-0 jafntefli gegn Reading.

Í Hull tóku heimamenn á móti Sheffield Utd. Sheffield er í mikilli baráttu við Leeds um annað sætið í deildinni. Sheffield fór þægilega með Hull í dag og var komið í 0-3 í hálfleik. David McGoldrick skoraði tvö marka Sheffield manna.

Rotherham leiddi 1-0 í hálfleik gegn Birmingham. Rotherham var fyrir umferðina þremur stigum á eftir Millwall sem er í fjórða neðsta sæti og síðasta örugga sæti deildarinnar. Birmingham sneri taflinu við í seinni hálfleik og vann 1-3 sigur.

Swansea heldur í smá von um að komast í umspilssæti og liðið vann góðan 0-1 sigur á föllnu liði Ipswich. Wigan bjargaði sér frá falli með 2-0 sigri á Preston sem á nú ekki lengur möguleika á umspilssæti.

Derby vann dramatískan sigur á QPR. Harry Wilson, lánsmaður frá Liverpool, skoraði úr vítaspyrnu á fjórðu mínútu uppbótartíma og tryggði Derby dýrmæt þrjú stig. Sigurinn liftir liðinu upp í sjötta sæti deildarinnar þar sem að Middlesbrough tapaði illa, 3-0 gegn Nottingham Forest.

Bristol City mistókst að komast í sjötta sætið þegar liðið tapaði á útivelli gegn Sheffield Wednesday. Bristol City, Middlesbrough, Sheffield Wednesday og Swansean eiga möguleika á því að ná inn í umspil. Aston Villa er nánast öruggt með sæti sitt þar.