Manuel Pellegrini knattspyrnustjóri West Ham var skiljanlega pirraður þegar hann mætti í viðtal að leik loknum.

„Ég veit ekki hvort ég eigi að segja að þetta hafi verið óásættanleg frammistaða. Fyrsta markið sem við fengum á okkur kom eftir hornspyrnu sem átti ekki að vera hornaspyrna," sagði Pellegrini.

„Það hjálpar að sjálfsögðu ekkert þegar við erum að fá á okkur svona mörk. Ég hef áhyggjur af því hversu mörg mörk við erum að fá á okkur, við þurfum að gera breytingar á okkar leik. Ég kýs að tala ekki um einstaka leikmenn, ég tala frekar um liðið."

„Við höfum núna 15 daga til að laga það sem betur má fara. Landsleikjahléið kemur á góðum tíma, við þurfum að leggja mikla vinnu á okkur núna á næstu dögum. Þetta snýst ekki bara um sjálfstraustið, við erum einfaldlega að fá á okkur alltof mörg mörk. Þegar maður fær á sig svona mörg mörk er mjög erfitt að vinna leiki," sagði Pellegrini sem hefur verk að vinna í landsleikjahléinu.