Chelsea hafði betur gegn þýska stórveldinu Bayern München, 4-1, í síðari leik liðanna í undanúrslitum, og samanlagt 5-3. Karólína Lea Vilhjálmsdóttir var ónotaður varamaður hjá Bayern í gær.

Hayes hefur stýrt Chelsea frá 2012 og gert magnaða hluti. Hún er samt núna á leið í úrslitaleikinn í fyrsta sinn.

„Allt mitt líf hef ég unnið að þessum degi. Ég er svo stolt af leikmönnunum," sagði Hayes í viðtali eftir leikinn.

„Ég er líka stolt af sjálfri mér. Ég komst hingað með erfiðisvinnu, með áræðni og er heppin að fá að vinna fyrir fótboltafélag sem ég dái."

Chelsea mætir Barcelona í úrslitaleiknum.