Vinstri bakvörðurinn Birgir Baldvinsson er að ganga í raðir Vals en hann er samningslaus eftir að hafa rift samningi við KA.

Frá þessu greinir Kristján Óli Sigurðsson, einn af umsjónarmönnum Þungavigtarinnar, á Twitter. Hann og Arnar Grétarsson þjálfari Vals eru góðir vinir.

Birgir er 21 árs vinstri bakvörður sem uppalinn er hjá KA og lék sinn fyrsta meistaraflokksleik sumarið 2018. Hann hefur spilað með Leikni í Breiðholti á lánssamningi síðustu þrjú ár.

Eftir fall Leiknis ákvað Birgir að halda áfram að spila í Bestu deildinni. KA vildi semja við hann aftur og þá hafði Stjarnan einnig áhuga á honum. Samkvæmt Kristjáni Óla þá hefur Birgir ákveðið að fara á Hlíðarenda.

Hann fylgir þá Sigurði Heiðari Höskuldssyni þangað en Sigurður hefur þjálfað Birgi undanfarin ár og er nú orðinn aðstoðarmaður Arnars hjá Val.