Hrósar íslenska aganum
Wiegman fór fögrum orðum um íslenska liðið og segir það vera prófstein sem muni reyna mikið á ensku stelpurnar.
„Þetta verður mjög sterkur prófsteinn. Íslenska liðið er mjög agað, líkamlega sterkt og spilar mjög beinskeyttan bolta með miklum hraða,“ sagði Wiegman.
Hún bætti því við að þrátt fyrir að England verði líklega meira með boltann, þá verði þrautin þyngri að opna íslensku vörnina. „Við höfum séð þær spila, meðal annars gegn Spáni, og þær eru mjög seigar og erfitt að vinna þær. Við þurfum að vera upp á okkar allra besta til að sigra þennan leik.“
Lykilmaður Englands fjarri góðu gamni
Slæmu tíðindin úr herbúðum Englands eru þau að varnarmaðurinn öflugi, Alex Greenwood, mun missa af leiknum. Hún glímir við minniháttar vöðvameiðsli og þótt hún hafi sjálf verið „örvæntingarfull“ að fá að spila, vildi Wiegman ekki taka neina áhættu svo snemma.
Þolinmæði er lykilatriði
Framherjinn Alessia Russo tók í sama streng og þjálfarinn og sagði að ensku leikmennirnir mættu ekki missa móðinn þótt mörkin kæmu ekki strax.
„Það er auðvelt að fyllast pirringi í svona leikjum en við þurfum að vera þolinmóðar og bíða eftir að glufurnar myndist þegar þreytan fer að segja til sín hjá andstæðingnum,“ sagði Russo, sem sjálf er í miklu markastuði og segist hlakka mikið til leiksins.
