Breiðablik hefur kallað markvörðinn Ólaf Íshólm Ólafsson til baka úr láni frá Fram og hann er þegar kominn með leikheimild með félaginu. Hann var lánaður til Fram í vetur og spilaði með liðinu gegn Þór á Akureyri á föstudagskvöldið.
Gunnleifur Gunnleifsson markvörður liðsins meiddist í baki og varð að fara af velli snemma leiks gegn KR í vikunni og hefur verið óvissa með hversu lengi hann verður frá.
Hlynur Örn Hlöðversson varmarkvörður leysti stöðu hans í leiknum gegn KR.
Breiðablik gerði svo óvænt tilboð í Anton Ara Einarsson varamarkvörð Vals í byrjun vikunnar en því tilboði var umsvifalaust hafnað.
Nú er félagið búið að kalla Ólaf Íshólm til baka úr láninu hjá Fram en hann hefur spilað alla leiki Fram í Inkasso-deildinni í sumar og staðið sig mjög vel.
Breiðablik mætir HK klukkan 19:15 í kvöld og spurning hvort Ólafur standi í marki Blika í þeim leik.
Athugasemdir