Hasan Salihamidzic, stjórnandi hjá FC Bayern, er búinn að staðfesta að þýsku risarnir höfnuðu 'mikilvægu' tilboði í hægri bakvörðinn sinn Benjamin Pavard á lokadegi félagsskiptagluggans í janúar.
Real Madrid, Barcelona og Inter eru meðal félaga sem vildu krækja í Pavard í janúar.
„Við fengum mikilvægt tilboð í Pavard á gluggadegi en gátum ekki samþykkt það. Við getum ekki klárað tímabilið án hans. Þetta var mikilvægt tilboð fjárhagslega séð en hann er ómissandi fyrir okkur," sagði Salihamidzic við Bild.
Pavard, 26 ára með tæpa 150 leiki að baki fyrir Bayern, á tæpa átján mánuði eftir af samningi sínum við félagið.
Hann á einnig 47 leiki að baki fyrir franska landsliðið og varð heimsmeistari í Rússlandi 2018.
Athugasemdir