Chelsea fékk dýrmæt þrjú stig í ensku úrvalsdeildinni í kvöld er liðið fékk Everton í heimsókn í Evrópuslag í deildinni.

Bæði lið eru að leitast eftir því að ná Meistaradeildarsæti og hefðu þrjú stigin gert afskaplega mikið.

Chelsea komst yfir eftir 31 mínútu í fyrri hálfleik en Ben Godfrey varð þá fyrir því óláni að skora sjálfsmark fyrir Everton.

Kai Havertz átti stóran þátt í því marki en hann skoraði svo sjálfur í seinni hálfleik mark sem var dæmt af.

Þjóðverjinn kláraði færi sitt vel innan teigs en VAR skoðaði markið nánar og var dæmd hendi innan teigs og fékk Everton aukaspyrnu.

Havertz átti svo aftur stóran þátt í öðru marki Chelsea en hann fékk þá sendingu inn fyrir vörn Everton áður en Jordan Pickford, markvörður Everton, gerðist brotlegur innan teigs og vítaspyrna dæmd.

Ítalinn Jorginho steig á punktinn og skoraði örugglega framhjá Pickford til að gulltryggja Chelsea sigurinn.

Gylfi Þór Sigurðsson lék 70 mínútur með Everton en hann var tekinn af velli á 70. mínútu fyrir Joshua King.