Hákon Rafn Valdimarsson er í þriðja sæti á lista Fotbollskanalen yfir bestu leikmenn sænsku úrvalsdeildarinnar á liðnu tímabili. Hákon varði mark Elfsborg sem var hársbreidd frá því að tryggja sér sænska meistaratitilinn.
„Hann var markvörður ársins í deildinni og það verður erfitt fyrir Elfsborg að halda honum. Hann veit hvernig á að verja skot og er ákveðinn í teignum. Tilfinningin er að hann hiki aldrei í aðgerðum sínum," segir í umsögn Fotbollskanalen um Hákon.
Hákon lék sinn fyrsta keppnisleik fyrir A-landsliðið á dögunum og stóð sig þá vel í tapi gegn Portúgal í Lissabon.
Brasilíumaðurinn Gabriel Busanello hjá Malmö er í öðru sæti listans yfir bestu leikmenn tímabilsins í Svíþjóð og Samuel Gustafson miðjumaður Häcken í því fyrsta.
Tveir aðrir Íslendingar eru á listanum; Arnór Sigurðsson er í fimmtánda sæti en hann yfirgaf Norrköping á árinu og gekk í raðir Blackburn. Þá er Arnór Ingvi Traustason hjá Norrköping í 25. sæti.
Athugasemdir
