Englandsmeistarar Liverpool unnu naumlega gegn botnliði Wolves er liðin mættust á Anfield í dag.
Heimamenn í Liverpool komust í tveggja marka forystu í fyrri hálfleik en Úlfarnir minnkuðu muninn og hefðu getað gert jöfnunarmark í síðari hálfleiknum.
„Þetta spilaðist nákvæmlega eins og við vildum þar til þeir minnkuðu muninn eftir fast leikatriði sem við vörðumst ekki nægilega vel. Við erum að fá of mikið af mörkum á okkur úr föstum leikatriðum en það jákvæða er að við höfum unnið tvo síðustu leiki sem það hefur gerst í. Við verðum að bæta vörnina í föstum leikatriðum, það er augljóst," sagði Arne Slot þjálfari eftir lokaflautið.
Liverpool er í fjórða sæti með 32 stig eftir 18 umferðir, tíu stigum á eftir toppliði Arsenal. Hinn umdeildi Florian Wirtz skoraði langþráð mark í sigrinum í dag.
„Það er gott fyrir hann að skora fyrsta markið sitt. Hann er búinn að vera mikilvægur fyrir okkur á tímabilinu, hans framlag snýst um mikið meira heldur en bara mörk eða stoðsendingar.
„Hann sýndi gæðin sín í dag og hjálpaði okkur á ótal vegu, ekki bara með því að skora. Því miður er fótbolti íþrótt þar sem fólk einblínir á tölfræði þó að hún gefi ekki endilega rétta mynd af frammistöðu leikmanna. Florian (Wirtz) á eftir að skora og leggja mikið upp fyrir Liverpool í framtíðinni."
Liverpool tekur á móti Leeds United á nýársdag í næstu umferð deildartímabilsins.
Athugasemdir
