Fyrsta málefnið sem tekið var fyrir var styrking Víkinga en í gær var greint frá því að Kristall Máni Ingason væri á leið í Víkina.

Í kjölfarið spratt upp umræða hvort baráttan við toppinn væri nú milli fjögurra liða en til þessa hafa KR, Valur og Breiðablik verið í efstu sætunum í ótímabæru spám þeirra Elvars og Tómasar.

Rætt var um ummæli Kára Árnasonar að hann hefði trú á að Víkingar gætu orðið Íslandsmeistarar.

„Ættum við að tala um frekar um fjögurra hesta kapphlaup fyrir mótið?" Spurði Elvar.

„Af hverju er Breiðablik í umræðunni? Af hverju er það svona augljóst með nýjan þjálfara?" Spurði Tómas á móti.

„Breiðablik hefur verið í topp þremur í spám okkar," svaraði Elvar og Magnús bendir á að liðið hafi verið í öðru sæti síðustu tvö tímabil. Magnús hefur þá frekar trú á að Breiðablik geti unnið titilinn heldur en Víkingur.

„Ég sé þetta sem topp tvo og svo koma Breiðablik og Víkingur í kjölfarið, en ég skil alveg sjónarmið Kára," svaraði Tómas.

„Eru þá bara þessi tvö lið (Valur og KR) sem eiga raunhæfa möguleika á titlinum að þínu mati?" Spurði Elvar.

„Ekki raunhæfa en Valur og KR eru enn líklegust," svaraði Tómas.