Gundogan, sem hefur verið í lykilhlutverki hjá Manchester City, er að verða samningslaus.

Gundogan, sem er 32 ára gamall, hefur leikið með Man City frá 2016. Þar áður var hann hjá Borussia Dortmund í heimalandi sínu, Þýskalandi.

Hann hefur verið gríðarlega góður þjónn fyrir City og er hann til að mynda búinn að vera frábær seinni hlutann á þessu tímabili. Hann skoraði bæði mörk liðsins í úrslitaleik FA-bikarsins og var mjög mikilvægur þegar liðið tryggði sér titilinn í ensku úrvalsdeildinni.

City vill endursemja við hann en hann er sagður ætla að hefja nýjan kafla á sínum ferli í Katalóníu.

Gundogan er að fara að spila með City í úrslitaleik Meistaradeildarinnar á laugardaginn en Mundo Deportivo segir að hann verði kynntur hjá Barcelona eftir þann leik. Börsungar hafa verið í fjárhagsvandræðum en fundu nægilega mikið pláss í áætlun sinni til að semja við þýska miðjumanninn.