„Við erum búnir að mæta þeim svo oft. Þetta er farið að venjast nokkuð vel. Ég var þarna fyrir tveimur árum og það eru nokkrir eftir síðan þá," sagði Matthías Vilhjálmsson, leikmaður Víkings, eftir 2-0 sigur Víkings gegn FH í Bestu deildinni í gær.
Hann segist vera farinn að venjast því að spila gegn uppeldisfélaginu sínu, FH. Fyrir síðasta tímabil tók Matthías þá ákvörðun að breyta um umhverfi og fór yfir í Víking þar sem hann varð Íslands- og bikarmeistari á sínu fyrsta tímabili.
Hann segist vera farinn að venjast því að spila gegn uppeldisfélaginu sínu, FH. Fyrir síðasta tímabil tók Matthías þá ákvörðun að breyta um umhverfi og fór yfir í Víking þar sem hann varð Íslands- og bikarmeistari á sínu fyrsta tímabili.
Hann ber samt sem áður enn gríðarlega virðingu fyrir FH og sínum fyrrum þjálfara, Heimi Guðjónssyni. Það ríkir mikil gagnkvæm virðing þar á milli.
„Ég þekki Heimi vel og hann er að byggja upp alvöru lið í Krikanum. Ég þekki hans gildi og hann er einn af færustu þjálfurum Íslands. Vonandi gengur þeim vel og ég þakka þeim fyrir leikinn í kvöld," sagði Matthías.
Heimir var sjálfur spurður út í sinn fyrrum lærisvein, hvernig það væri að spila gegn honum.
„Matti er toppdrengur. Ég þjálfaði Matta á sínum tíma hjá FH og kenndi honum allt sem hann kann," sagði Heimir og brosti. „Hann er alltaf þakklátur þegar ég hitti hann."
„Við erum miklir vinir. Matti hefur átt frábæran feril sem fótboltamaður og er alltaf í toppstandi. Hann hefur í gegnum tíðina verið góð fyrirmynd fyrir yngri leikmenn."
Víkingar tóku í gær þriggja stiga forskot á FH á toppi deildarinnar en það verður spennandi að fylgjast með þróun mála á næstu vikum.
Hægt er að sjá viðtölin við þá báða í spilaranum hér fyrir neðan.
Athugasemdir