Erik ten Hag, stjóri Manchester United, segir að það sé ekki í plönum Cristiano Ronaldo að yfirgefa félagið áður en félagsskiptaglugginn lokar.
Mikið hefur verið rætt og ritað um framtíð Ronaldo en hann er sagður vilja fara til liðs sem mun spila í Meistaradeild Evrópu á þessari leiktíð. Allt virðist nú stefna í það að Portúgalinn verði áfram í Manchester.
„Hann hefur ekki sagt mér það,” sagði Ten Hag þegar hann var spurður út í Ronaldo og að hann vilji fara frá félaginu.
„Við höfum nú þegar staðfest það að hann er í okkar plönum. Við plönum liðið með hann í huga og einnig í kringum hann,” sagði Ten Hag á blaðamannafundi fyrir leikinn gegn Brentford í dag.
Þá tjáði hann sig einnig um Marcus Rashford en hann sagði að hann vilji alls ekki missa Rashford frá félaginu eins og greint var frá í gær.
Man Utd tapaði fyrsta deildarleik sínum sem var gegn Brighton um síðustu helgi en leiknum lauk með 1-2 sigri Brighton á Old Trafford.
