Í dag var dregið í fyrstu riðlakeppnina í sögu Meistaradeildar kvenna. Breiðablik var fyrst íslenskra liða til að vera í pottinum þegar dregið var í riðlakeppni í Evrópukeppni. Breiðablik lagði króatíska liðið Osijek á fimmtudag og tryggði sér sæti í riðlakeppninni.

Breiðablik er í B-riðli með Frakklandsmeisturum PSG, spænska stórliðinu Real Madrid og Kharkiv frá Úkraínu.

Barcelona er ríkjandi Evrópumeistari og liðið er í C-riðli. D-riðill er svo Íslendingariðill. Karólína Lea Vilhjálmsdóttir og Glódís Perla Viggósdóttir eru hjá Bayern, Sara Björk Gunnarsdóttir er hjá Lyon, Diljá Ýr Zomers er hjá Häcken og Cloe Lacasse er í Benfica.

Í riðlakeppni er leikið heima og að heiman og hefst riðlakeppnin í október.