Arnar Hallsson, nýr þjálfari Njarðvíkur.
Njarðvík stefnir á topp fimm í Lengjudeildinni.
„Þetta leggst mjög vel í mig," segir Arnar Hallsson, nýráðinn þjálfari Njarðvíkur. Hann hlakkar til að takast á við nýtt verkefni á Suðurnesjum og er bjartsýnn á framhaldið.
Arnar hefur á sínum þjálfaraferli meðal annars þjálfað meistaraflokk karla hjá Aftureldingu og ÍR. Hann hætti hjá Breiðholtsliðinu á miðju tímabili í sumar þegar hann sagði félagið ekki hafa staðið við gefin loforð.
Arnar hefur á sínum þjálfaraferli meðal annars þjálfað meistaraflokk karla hjá Aftureldingu og ÍR. Hann hætti hjá Breiðholtsliðinu á miðju tímabili í sumar þegar hann sagði félagið ekki hafa staðið við gefin loforð.
Einar Orri Einarsson og Magnús Þórir Matthíasson, sem voru lykilmenn á síðustu leiktíð, verða ekki með liðinu á næstu leiktíð. Einar Orri fékk ekki nýjan samning hjá félaginu og Magnús Þórir ákvað að hætta í fótbolta.
„Ég veit ekki um neina aðra sem við höfum misst en þessa tvo. Við ætlum okkur ekki að missa fleiri. Vonandi náum við að vinna með hópinn sem við höfum og fylla upp í það á þann hátt. Vonandi náum við að vinna það upp með góðri vinnu með þessum sem hér með mér standa. Við ætlum að leggja okkur alla fram í að gera leikmennina betri og það mun skila einhverju. Svo er alveg ljóst að við munum styrkja liðið líka," segir Arnar.
Þjálfarateymið sem stýrði Njarðvík til sigurs í 2. deildinni í sumar hefur kvatt félagið og mun Arnar stýra liðinu í Lengjudeildinni á næstu leiktíð ásamt sínu teymi. Hann tekur við liðinu af Bjarna Jóhannssyni sem gerði ekki nýjan samning við félagið.
„Bjarni stóð sig frábærlega og skilaði framúrskarandi verki. Það er alveg ljóst að við þurfum að standa okkur. Ég er alveg viss um að við munum hrista saman einhvern kokteil sem virkar líka."
Stefnan hjá Njarðvík er sett á fimmta sætið eða ofar, en það verða breytingar á Lengjudeildinni á næstu leiktíð þar sem efsta sætið fer beint upp en liðin í öðru til fimmta sæti fara í úrslitakeppni um eitt laust sæti í efstu deild.
„Við erum þar," sagði Arnar en allt viðtalið má sjá í spilaranum hér fyrir ofan. Aðstoðarþjálfari hans verður Arnar Smárason, fyrrum þjálfari Víðis í Garði, og styrktarþjálfari er Sigurður Már Birnisson.
Athugasemdir
