„Hann er þar og annar af starfsmönnum knattspyrnudeildar ÍA er líka í fríi. Það greinilega nóg til eftir að Ísak var seldur. Þeir ætla að vera klárir í bikarleikinn. Jói mætir heltanaður á hliðarlínuna á Laugardalsvelli eftir níu daga," sagði Mikael Nikulásson í hlaðvarpsþættinum Þungavigtin.

„Þetta er ákvörðun sem formaðurinn stendur og fellur með. Mér finnst þetta skrítið og hefði bara viljað fresta ferðinni. Það er Evrópa undir," sagði Mikael.

Fótbolti.net spurði Jóa Kalla út í gagnrýnina í viðtali í dag.

„Menn hafa skoðun á því, ég átti mjög góða daga á Tene og náði að hlaða batteríin. Ég var þar frá þriðjudegi til laugardags og það hafði engin áhrif á undirbúning liðsins fyrir leikinn. Það er þessi æfingavika sem skiptir gríðarlega miklu máli og við komum vel undirbúnir inn í leikinn og ætlum okkur að vinna."

Hafði kannski góð áhrif
Ísak Bergmann skoraði sitt fyrsta landsliðsmark og þú varst ekki á vellinum.

„Ég sá það í sjónvarpinu og var virkilega stoltur af honum. Það hafði kannski góð áhrif á hann að við vorum ekki í stúkunni, ég og mamma hans."

„Það er frábært að sjá þróun hans sem leikmann. Sem knattspyrnuþjálfari finnst mér frábært að fylgjast með svona leikmanni sem hefur lagt gríðarlega mikið á sig og er að uppskera eftir því. Hann er hvergi nærri hættur, er með mikinn gríðarlega metnað og ætlar að halda áfram að bæta sig."

„Sem pabbi hans er ég fullur af stolti. Hann er ekki bara góður fótboltamaður heldur líka frábær persóna og mikil fyrirmynd og ég er rosalega stoltur af því."

Sjá einnig:
Jói Kalli talar Víkinga upp en kemur einnig inn á veikleika þeirra