Það eru þrír leikir á dagskrá í ítalska boltanum í dag og þar á meðal er ein afar spennandi viðureign í Meistaradeildarbaráttunni.

Lecce og SPAL eigast við í hörðum fallbaráttuslag í fyrsta leik. Lecce er búið að vinna tvo í röð og komið af fallsvæðinu sem stendur. SPAL vermir botnsætið, sjö stigum eftir Lecce.

Bologna og Genoa eigast svo við en lærisveinar Sinisa Mihajlovic eru á blússandi siglingu og geta blandað sér í Evrópubaráttuna. Genoa er enn í fallsæti þrátt fyrir sigur í síðustu umferð, þremur stigum eftir Lecce.

Í kvöld er leikur sem sannir knattspyrnuunnendur mega ekki missa af. Atalanta, sem er búið að skora 61 mark á deildartímabilinu, tekur á móti skemmtilegu sóknarliði Róma í hörkuleik.

Þrjú stig skilja liðin að í fjórða og fimmta sæti deildarinnar en Rómverjar eru búnir að tapa tveimur leikjum í röð, gegn Bologna og Sassuolo.

Leikir dagsins:
14:00 Lecce - Spal
17:00 Bologna - Genoa
19:45 Atalanta - Roma (Stöð 2 Sport)