Íslandstenging hjá Norður-Írum sem eru á leið á sitt fyrsta stórmót

Norður-Írar höfðu betur gegn Úkraínu í umspilinu. Norður-Írland vann einvígið samanlagt og verður því á meðal þáttökuþjóða í fyrsta sinn í Englandi á næsta ári.

„Við höfum breytt gangi kvennaboltans hérna til eilífðar og hann getur aðeins orðið stærri og betri eftir þetta," sagði fyrirliðinn Marissa Callaghan eftir sigurinn á Úkraínu.

Norður-Írland er í 49. sæti á heimslistanum en landsliðið var ekki til árið 2003. Það var sett aftur á laggirnar 2004 og núna eru ungar stelpur frá Norður-Írlandi með stórkostlegar fyrirmyndir sem munu spila á stórmóti á næsta ári.

Í liðinu eru fjórar sem hafa spilað á Íslandi á sínum ferli. Markvörðurinn Jacqueline Burns spilaði með ÍBV 2019, hin 35 ára gamla Julie Nelson lék með ÍBV 2011 og 2012, Rachel Furness lék með Grindavík 2010 og Sarah Robson lék með Fylki, Grindavík og FH hér á landi.

Þá hefur Lauren Wade, fyrrum leikmaður Þróttar, einnig verið í kringum hópinn.

Ísland er á leiðinni á sitt fjórða Evrópumót.

Auðvelt að samgleðjast Norður-Írlandi. Á leið á EM á næsta ári, aldrei komist á stórmót áður. Fjórir leikmenn hafa spilað með liðum á Íslandi. https://t.co/XJkYYJacfW

— Kristjana Arnarsdóttir (@kristjanaarnars) April 14, 2021