Ingvar ættu allir landsmenn að þekkja en hann er þrítugur hefur verið viðloðandi íslenska landsliðið undanfarin ár þar sem hann hefur spilað 8 leiki. Hann var síðast í landsliðshópnum í október þegar Ísland mætti heimsmeisturum Frakka og Andorra í undankeppni EM2020.

Ingvar yfirgaf danska félagið Viborg þegar samningur hans við félagið rann út um áramótin en hann hafði staðfest við Fótbolta.net í október að hann hafi rætt við íslensk félög. Hann var meðal annars orðaður við FH en Víkingur hreppti hann í dag.

Víkingar eru fyrir með markvörðinn Þórð Ingason sem mun keppa við Ingvar um byrjunarliðssætið í sumar.

Atli Barkarson er 19 ára gamall og kemur frá Fredrikstad í Noregi. Hann er uppalinn hjá Völsungi en fór 16 ára gamall til Norwich á Englandi þar sem hann spilaði með unglingaliðumí tvö ár.

Hann er vinstri bakvörður og hefur spilað 29 landsleiki fyrir yngri landslið Íslands og skorað í þeim fjögur mörk.

Arnar Gunnlaugsson þjálfar Víkinga áfram á komandi tímabili en hann gerði liðið að bikarmeisturum í fyrra. Hann hefur áður fengið framherjann efnilega Helga Guðjónsson frá Fram fyrr í vetur.

Víkingar hafa misst sjö leikmenn, Guðmundur Andri Tryggvason og Kwame Quee sneru til baka úr lánum, Gunnlaugur Fannar Guðmundsson fór í Kórdrengi og nafni hans, Gunnlaugur Hlynur Birgisson í Þrótt auk þess sem James Mack, Rick Ten Voorde og varamarkvörðurinn Francisco Marmolejo hafa yfirgefið félagið.