Fótbolti.net

þri 06. janúar 2026 23:47

Ívan Guðjón Baldursson

Nuno: Óheppnir með vítaspyrnudóminn

Mynd: EPA

Nuno Espírito Santo þjálfari West Ham var fúll eftir dramatískt tap á heimavelli gegn Nottingham Forest. Starf hans hjá félaginu er talið vera í bráðri hættu eftir slæm úrslit í síðustu leikjum.

West Ham er í fallsæti með 14 stig eftir 21 umferð, sjö stigum frá öruggu sæti. Nuno var að mæta sínum fyrrum lærisveinum í liði Forest en hann náði evrópusæti með þeim á síðustu leiktíð áður en hann var rekinn í september.

„Við spiluðum vel í dag og gerðum nóg til að vinna þennan leik. Við vorum með forystuna og skoruðum svo annað mark sem var dæmt af útaf naumri rangstöðu. Það er stundin sem breytti öllu, eftir þetta var ýmislegt sem kom uppá," sagði Nuno við fréttamenn.

„Við vorum góðir í fyrri hálfleik og byrjuðum seinni hálfleikinn vel en svo brjóta þeir á (Crysencio) Summerville, komast í skyndisókn, fá hornspyrnu og jafna leikinn. Þetta hafði neikvæð áhrif á hugarfar leikmanna þegar þeim líður eins og dómgæslan sé að falla gegn þeim.

„Við fengum fleiri færi til að skora en nýttum þau ekki. Strákarnir stóðu sig mjög vel, þeir börðust allan tímann og misstu aldrei trúna."

Nuno var ósáttur með vítaspyrnudóminn sem réði úrslitum á lokamínútum leiksins. Alphonse Areola markvörður ætlaði að kýla hornspyrnu frá marki en liðsfélagi hans Tomas Soucek var fyrstur til boltans og náði að skalla frá. Areola endaði á að kýla leikmann Forest og var dæmd vítaspyrna eftir athugun í VAR-herberginu.

„Við vorum óheppnir með vítaspyrnudóminn. Þetta er eitthvað sem gerist oft í fótboltaleikjum og þessi ákvörðun lætur mann efast um reglurnar. Hversu oft hefur nákvæmlega eins atvik átt sér stað á tímabilinu og hversu oft af þeim skiptum hefur verið dæmd vítaspyrna?

„Ég skil þetta ekki. Areola reynir að fara í boltann en Soucek er fyrri til. Areola getur þá ekki stoppað sig og það verður árekstur við andstæðinginn. Ég skil ekki hvernig þetta er vítaspyrna."

Nuno var spurður út í framtíðina, hvort hann óttist að vera rekinn úr starfi. Portúgalski þjálfarinn er ekki að hugsa um það, hann er einbeittur að því að snúa slæmu gengi West Ham við.

„Þetta er ekki búið. Við verðum að halda áfram að leggja hart að okkur á æfingum og gera allt í okkar valdi til að snúa þessu við. Ég veit að við getum gert það."

Sjáðu atvikið

		L	U	J	T	ms:	mf:	mun	Stig
1	Arsenal	20	15	3	2	40	14	+26	48
2	Man City	21	13	4	4	45	19	+26	43
3	Aston Villa	21	13	4	4	33	24	+9	43
4	Liverpool	20	10	4	6	32	28	+4	34
5	Brentford	21	10	3	8	35	28	+7	33
6	Newcastle	21	9	5	7	32	27	+5	32
7	Man Utd	21	8	8	5	36	32	+4	32
8	Chelsea	21	8	7	6	34	24	+10	31
9	Fulham	21	9	4	8	30	30	0	31
10	Sunderland	21	7	9	5	21	22	-1	30
11	Brighton	21	7	8	6	31	28	+3	29
12	Everton	21	8	5	8	23	25	-2	29
13	Crystal Palace	21	7	7	7	22	23	-1	28
14	Tottenham	21	7	6	8	30	27	+3	27
15	Bournemouth	21	6	8	7	34	40	-6	26
16	Leeds	21	5	7	9	29	37	-8	22
17	Nott. Forest	21	6	3	12	21	34	-13	21
18	West Ham	21	3	5	13	22	43	-21	14
19	Burnley	21	3	4	14	22	41	-19	13
20	Wolves	21	1	4	16	15	41	-26	7