Ítalski miðjumaðurinn Marco Verratti getur ekki beðið eftir að samherji hans í Paris Saint-Germain, Kylian Mbappe, ákveði framtíð sína en hann segir þetta í viðtali við Le Parisien.
Mbappe mun á næstu dögum tilkynna ákvörðun um framtíð sína en það er svo gott sem klárt að hann gangi til liðs við Real Madrid í sumar á frjálsri sölu.
Mikið hefur verið rætt og ritað um þetta mál. PSG hefur allan tímann sagt að hann yrði áfram á meðan Madrídingar voru vissir um að hann myndi vilja spila á Spáni.
„Þetta mun hafa áhrif á félagið, hver sem ákvörðun hans verður. Hann er einn besti leikmaður heims um þessar mundir og við viljum allir halda honum hér. Þú talar ekkert um svona erfiðar ákvarðanir í fótbolta."
„Þetta er hans ákvörðun og ég er að bíða eins og þú," sagði Verratti en honum varð flökurt þegar hann sá mynd af liðsfélaga sínum í Madríd á dögunum.
„Þegar það var frídagur þá fékk ég tilkynningu í símann og þar var sagt að Kylian væri í Madríd. Mér varð flökurt," sagði Verratti og hló en Mbappe útskýrði það fyrir honum og sagðist bara hafi verið þar í fríi.
Athugasemdir