Eftir að hafa slegið út Víking og KR þá tapaði ÍBV gegn Val í 8-liða úrslitum Mjólkurbikarsins í kvöld. Mark Hólmars Arnar Eyjólfssonar með skalla eftir hornspyrnu réði úrslitum.
Lestu um leikinn: ÍBV 0 - 1 Valur
„Þetta var sárt, þetta var mjög sárt. Við unnum okkur inn réttinn til að vera svekktir, við gáfum allt í þennan leik. Við spiluðum lungan úr seinni hálfleik mjög vel og þrýstum þeim niður og fengum færi," segir Þorlákur Árnason, þjálfari ÍBV.
„Það sem hefur stór áhrif á leikinn er að við áttum klárlega að fá eina vítaspyrnu, ég var að sjá þetta í sjónvarpinu inni. Ég held að ég hafi sjaldan séð eins einhliða dómgæslu í fótboltaleik."
Þorlákur vildi fá hendi á leikmann Vals á 70. mínútu leiksins og fannst dómgæsla Twana Khalid Ahmed halla á sitt lið.
„Maður ber virðingu fyrir dómurum en þegar þú ert að gefa öðru liðinu gul spjöld en sleppir hinu liðinu fyrir sama hlutinn. Þá sérðu bara misræmi í dómgæslu. Maður sér með eigin augum leikmann leggja boltann fyrir sig með hendi og í sjónvarpi sér maður það líka. Ég á ekki orð yfir það hversu einhliða dómgæslan var í þessum leik. Þetta var til algjörrar skammar."
Í viðtalinu talar Láki nánar um dómgæsluna.
Athugasemdir
