Davíð Smári Lamude, þjálfari Vestra, var auðvitað í skýjunum með að hafa komið liðinu áfram í undanúrslit Mjólkurbikarsins er það lagði Þór, 2-0, á Kerecis vellinum á Ísafirði í kvöld.
Lestu um leikinn: Vestri 2 - 0 Þór
Frammistaða Vestra var fagmannleg að sögn Davíðs, en bæði mörk liðsins komu með sex mínútna millibili í fyrri hálfleiknum og náðu heimamenn að gera vel að sigla þessu heim.
„Sáttur að vera kominn áfram. Þetta eru snúnir leikir þessir bikarleikir, þannig maður er bara hrikalega sáttur með það og fagmannleg frammistaða frá Vestramönnum,“ sagði Davíð við Fótbolta.net.
Eiður Aron Sigurbjörnsson hefur verið frábær á tímabilinu og kom að báðum mörkum Vestra í kvöld. Davíð sparaði ekki yfirlýsingarnar þegar hann var spurður út í frammistöðu Eiðs.
„Eiður er náttúrulega einn af bestu leikmönnum, og ég ætla að leyfa mér að segja það, landsins í augnablikinu og er á toppstað í sínu líkamlega atgervi svo það er ekkert sem kemur á óvart.“
Daði Berg Jónsson var ekki með Vestra í kvöld, en Davíð segir að hann hafi ákveðið að spara hann þar sem hann fann aðeins til fyrir leikinn.
„Við erum aðeins að spara hann. Daði fann eitthvað örlítið til, þannig bara spörum hann og vonandi verður hann klár á sunnudaginn,“ sagði Davíð í lokin.
