Breytingar í farvatninu hjá Dýrlingunum

The Sun segir að æðstu menn Southampton séu að ræða um það að reka Hasenhuttl. Annar möguleiki sem ku vera til umræðu er að reka þjálfarateymið í kringum hann og fá inn nýja menn honum til aðstoðar.

Það hefur gengið verulega illa hjá Southampton síðan í mars og liðið var farið að daðra við fallbaráttu á tímabili eftir að hafa fengið á sig 24 mörk í 10 leikjum.

Það heyrðist sungið 'Rekinn á morgun!' frá stuðningsmönnum Southampton í 3-0 tapi gegn Brentford þann 7. maí.

Hasenhuttl tók við Southampton í desember 2018 og innleiddi ferskan og kraftmikinn leikstíl. Á hans fyrsta heila tímabili endaði liðið í 11. sæti en framþróunin hefur staðnað og síðustu tvö tímabil hefur 15. sæti verið niðurstaðan.

Sport Republic eignaðist Southampton í janúar en þar fara fremstir í flokki serbneski milljarðamæringurinn Dragan Solak og Daninn Rasmus Ankersen.