Ísak Bergmann Jóhannesson lék allan leikinn er Norrköping gerði jafntefli við AIK í dag. Kolbeinn Sigþórsson spilaði síðasta hálftímann í liði AIK.

Norrköping stöðvaði þar með sigurgöngu AIK sem var búið að vinna fjóra deildarleiki í röð eftir hörmulegan fyrri hluta tímabils.

Leikurinn í dag var fjörugur þar sem bæði lið fengu góð færi en það voru gestirnir sem fóru með óverðskuldaða forystu inn í leikhlé.

Heimamenn í Norrköping mættu inn í seinni hálfleikinn af krafti og sneru Jonathan Levi og Henrik Castegren stöðunni við með mörkum á fyrstu fimm mínútunum.

Norrköping hélt forystunni allt þar til í lokin þegar Sebastian Larsson, sem á rétt tæplega 300 leiki að baki í ensku úrvalsdeildinni, jafnaði með marki úr vítaspyrnu.

Norrköping er í öðru sæti eftir jafnteflið og í harðri fimm liða baráttu um síðustu Evrópusætin. AIK er níu stigum frá Evrópu en á leik til góða.

Aðeins fimm umferðir eru eftir af sænska deildartímabilinu.