Murphy veltir spilamennsku United-liðsins fyrir sér hvort Paul Pogba, sem tekinn var af velli snemma í seinni hálfleik, og Bruno Fernandes geti spilað saman á miðjunni í leikkerfi United. Murphy er á þeirri skoðun að þeir geti ekki spilað saman.

„Ole Gunnar Solskjær [stjóri Manchester United] er með stóra ákvörðun fyrir framan sig sem hann þarf að taka því Manchester United mun halda áfram að fá á sig mörk ef hann heldur áfram að spila Paul Pogba og Bruno Fernandes saman."

„Þeir eru báðir mjög skapandi en hvorugur er nægilega góður varnarlega til að spila saman á þriggja manna miðju. Það er alveg klárt gegn topp sex liðunum og á laugardag þá voru þeir oft nappaðir úr stöðu gegn Brighton. Þetta er ekki leti hjá Bruno eða Pogba. Þetta er bara hvernig þeir spila og varnarlega þurfa þeir að bregðast við í stað þess að þetta komi náttúrulega til þeirra. Þeir sjá hreinlega ekki hættuna nógu snemma. Þegar þeir átta sig á hættunni þá verða þeir að koma sér til baka og þá er það um seinan."

Murphy er spenntur fyrir kaupunum á Donny van de Beek og segir hann betri varnarlega en bæði Bruno og Pogba. Hann segir að Ole geti spilað Pogba og Bruno saman gegn slakari andstæðingum sem bjóða ekki upp á mikla sóknarógn.