Óli Jó á hliðarlínunni í sumar.
„Mér fannst við betri í 90 mínútur og er ótrúlega fúll að fá ekkert út úr leiknum en svona er fótboltinn stundum," sagði Ólafur Jóhannesson þjálfari FH eftir 1 - 2 tap heima gegn Víkingum í Pepsi Max-deildinni í kvöld.
Lestu um leikinn: FH 1 - 2 Víkingur R.
„Mér fannst þetta geggjaður leikur hjá báðum liðum, frábærar aðstæður, blautt grasið og geggjaður leikur. Því miður fengum við samt ekkert út úr honum," sagði hann og hélt áfram.
„Við fáum færi til að skora mörk en skorum ekki, það vantar að skora. Mér fannst leikurinn fyrst og fremst frábær," sagði hann en er svona mikill missir að hafa ekki Steven Lennon til að skora frammi?
„Við stillum bara upp okkar besta liði, það þýðir ekki að velta sér upp úr því sem er ekki til. Þetta er liðið sem við erum með í dag, við stilltum upp fínu liði sem var með fína frammistöðu en því miður fengum við ekkert út úr því."
Björn Daníel Sverrisson kom inná sem varamaður í dag og skoraði geggjað mark með hjólhestaspyrnu.
„Þetta var geggjað mark hjá honum sem kryddaði leikinn. Það var mjög fallegt en gaf okkur ekkert," sagði Óli en þegar honum var bent á að hann hafi nú aldrei reynt svona svaraði hann: „Þá hefði þetta ekki verið neitt geggjað því þá væri búið að gera svona ef ég hefði einhvern tíma reynt það. Það var einn og einn sem gat þetta í gamla daga en það var bara möl þá svo menn gerðu þetta ekki þar."
Nánar er rætt við Óla í spilaranum að ofan. Hann ræðir þar endalokin á tímabilinu og segist vilja sjá góða frammistöðu út tímabilið þó liðið komist ekki ofar í töflunni. Að lokum var hann spurður hvort hann væri að hugsa til lengri tíma með FH en hann samdi út tímabilið?
„Ég er bara að hugsa til loka tímabilsins. Þá fer ég til Spánar í golf og það kemur í ljós hvort ég hætti hér. Það er ekki í mínum höndum," sagði hann.
Athugasemdir
