Arnór Smárason var í byrjunarliðinu er topplið Helsingborg tapaði óvænt fyrir fallbaráttuliði Djurgården í sænsku efstu deildinni.

Arnór skoraði fyrsta mark leiksins um miðjan fyrri hálfleik en Godsway Donyoh jafnaði leikinn rétt fyrir leikhlé.

Heimamenn voru sterkari í leiknum og komust yfir snemma í síðari hálfleik með marki frá Amadou Jawo.

Meira var ekki skorað og er Helsingborg enn á toppi deildarinnar, en nú aðeins með tveggja stiga forskot.