Zinchenko hefur skorað 12 mörk í 75 landsleikjum með Úkraínu.
De Telegraaf greinir frá því að úkraínski bakvörðurinn Oleksandr Zinchenko sé á leið til Ajax. Fabrizio Romano tekur undir fregnirnar og hefur sett „here we go!" stimpilinn sinn á félagaskiptin.
Zinchenko mun spila fyrir hollenska stórveldið á lánssamningi út tímabilið. Eftir tímabilið verður Zinchenko orðinn samningslaus.
Zinchenko er 29 ára gamall og kom við sögu í 93 leikjum á þremur árum hjá Arsenal eftir að félagið keypti hann úr röðum Manchester City sumarið 2022. Hann er á sínu fjórða ári hjá Arsenal en lék með Nottingham Forest á láni á fyrri hluta tímabils, án þess að takast að vinna sér inn sæti í byrjunarliðinu.
Ajax er búið að ná munnlegu samkomulagi við Arsenal og er Zinchenko spenntur að reyna fyrir sér í nýrri deild.
Ajax borgar launakostnaðinn sem fylgir Zinchenko en er annars ekki talið greiða neitt fyrir lánssamninginn.
Athugasemdir
