Leifur með bendingar á hliðarlínunni í dag.
,,Mér finnst eins og við eigum eitthvað inni en á móti kemur að við spiluðum oft fanta fótbolta hér í fyrra og fengum ekki stigin en við erum allavega að fá stig núna og erum ósigraðir á heimavelli, það er lykilatriði, þú verður að vinna heimaleikina þína," sagði Leifur Garðarsson þjálfari Víkings eftir 1-0 sigur á Njarðvík í dag.
,,Ef við spilum illa í allt sumar og vinnum leikina þá endar það vel. Þá er mér skítsama," hélt Leifur áfram.
Leifur skartaði fallegri bleikri skyrtu og peysu í sama lit í dag og hafði verið flottur í tauinu í síðasta leik gegn Sindra í bikarnum í vikunni. Hann var spurður út í það.
,,Það var skorað á mig að breyta aðeins til, sérstaklega því vinir mínir í Sindra komu í heimsókn. Það er mikið stórveldi og frábært félag. Svo hélt þetta áfram því menn voru að gera grín að nýja varabúningi Everton og sögðu að hann væri bleikur og ljóstur sem ég er algjörlega ósammála. Einhver fallegasti knattspyrnubúningur sem maður hefur séð síðari ár. Þannig að ég ákvað að stríða mönnum og vera bleikur í dag."
