Kolbeinn Tumi í viðtalinu.
„Holland er með sterkara lið, bæði á pappírnum og í sögulegu samhengi. Við tókum þá í gegn á Laugardalsvelli og þeir eru brenndir af því," segir Kolbeinn Tumi Daðason, fréttastjóri Vísis, í viðtali við Fótbolta.net í Hollandi.
Tumi var íþróttafréttamaður áður en hann var ráðinn fréttastjóri og bregður sér aftur í það hlutverk fyrir 365 miðla í Amsterdam.
Tumi var íþróttafréttamaður áður en hann var ráðinn fréttastjóri og bregður sér aftur í það hlutverk fyrir 365 miðla í Amsterdam.
„Persónulega finnst mér mjög gaman að taka smá pásu af fréttum af þingmönnum og skrifa fréttir um okkar aðalhetjur."
Búast má við því að varnarskipulagið verði í forgrunni hjá íslenska landsliðinu á fimmtudag og liðið haldi sig til baka til að byrja með.
„Það er mikilvægt að skotgrafirnar okkar verði framarlega á vellinum, að við verðum ekki inn á okkar þriðjungi að verjast heldur séum við miðjuna eða ofar eins og í leiknum heima. Þar vorum við passífir en unnum 2-0. Við verðum að mæta þeim þannig að þeir fái ekki nein svæði til að leika sér með boltann. Það gerðum við rosalega vel á Laugardalsvelli en það er meira en að segja það að mæta til Hollands og ætla að gera það sama og við gerðum heima," segir Tumi.
Ljóst er að Emil Hallfreðsson verður ekki með gegn Hollendingum en hann var í byrjunarliðinu í síðasta leik. Hvaða breytingar reiknar Tumi með að gerðar verði?
„Þeir eru mjög íhaldssamir og ég á ekki von á miklum breytingum. Gylfi og Aron verða áfram á miðjunni ef Aron verður heill. Birkir og Jói verða líklega á köntunum og svo er bara spurning hver verður með Kolla frammi? Jói Berg verður í liðinu, þetta er bara spurning hver kemur inn í framherjann held ég," segir Tumi sem spáir 1-1 en spjallið má sjá í heild í sjónvarpinu hér að ofan.
