U21 landsliðið er einungis með eitt stig eftir leiki gegn Færeyjum og Eistlandi í undankeppni EM. Liðið mætir Sviss og Lúxemborg í komandi landsliðsglugga, Fótbolti.net ræddi við Ólaf Inga Skúlason, þjálfara U21 landsliðsins, fyrir komandi verkefni.
„Við erum náttúrulega ekki ánægðir með uppskeruna í síðasta glugga en erum bjartsýnir fyrir komandi verkefni. Þetta eru tvö hörkulið sem við mætum Sviss og Lúxemborg.“
„Sviss er hörkulið, unnu Eistana í sínum fyrsta leik í riðlinum. Vel spilandi og gott lið eins og við mátti búast. Lúxemborg átti keimlíkan leik og við gegn Færeyjum, þar sem þeir voru töluvert betri aðilinn í leiknum en Færeyingarnir unnu.“
Íslenska liðið er einungis með eitt stig eftir fyrstu tvo leikina. Heldur liðið í sömu markmið og fyrir undankeppnina?
Við horfum í að keppast um annað sætið. Það þýðir að þessi gluggi þurfi að vera góður. Við þurfum að ná í úrslit, það er eins einfalt og það er. Það hefur ekkert breyst frá síðasta glugga. Það er okkar markmið að gera tilkall í þetta annað sæti.“
Hvað þarf að laga?
„Við þurfum að fækka mistökum, þurfum að vera betri í báðum teigum. Ég hef oft sagt það að það sé erfitt að skora mörk í landsliðsbolta og erfitt þegar maður býður upp á mörk.“
„Við erum búnir að horfa aftur á leikina í síðasta glugga og það var margt mjög gott. Allir tölfræðiþættir voru okkur í hag, en það skiptir ekki máli. Það skiptir máli að ná úrslitum. Við erum búnir að fá á okkur fjögur skot á markið og þrjú af þeim fóru inn. Okkur hefur verið refsað fyrir mistök og við þurfum að fækka þeim og taka sénsana þegar þeir gefast.“
Ísland mætir Sviss á Swisspoarena í Luzern föstudaginn 10. október og Lúxemborg á Þróttarvelli þriðjudaginn 14. október.
| Lið | L | U | J | T | Mörk | mun | Stig |
|---|---|---|---|---|---|---|---|
| 1. Færeyjar | 3 | 3 | 0 | 0 | 5 - 2 | +3 | 9 |
| 2. Sviss | 1 | 1 | 0 | 0 | 2 - 0 | +2 | 3 |
| 3. Ísland | 2 | 0 | 1 | 1 | 2 - 3 | -1 | 1 |
| 4. Eistland | 3 | 0 | 1 | 2 | 2 - 5 | -3 | 1 |
| 5. Frakkland | 0 | 0 | 0 | 0 | 0 - 0 | 0 | 0 |
| 6. Lúxemborg | 1 | 0 | 0 | 1 | 0 - 1 | -1 | 0 |
