Liverpool er farið að undirbúa líf eftir Mohamed Salah og eru tveir menn sem gætu leyst stöðu hans í sumar.

Talið er líklegt að Liverpool muni selja Salah til Sádi-Arabíu í sumarglugganum, en frammistaða hans á þessu tímabili hefur verið mikil vonbrigði ef horft er á síðustu tímabil hans.

Liverpool gæti fengið allt að 100 milljónir punda fyrir söluna á Salah, en félagið ætlar að nýta þann pening vel.

Plettenberg segir Liverpool hafa mikinn áhuga þeim Yan Diomande hjá Leipzig og Michael Olise hjá Bayern München.

Diomande er 19 ára gamall og verið að gera gott mót með Leipzig, en hann er talinn verðmetinn á 80 milljónir punda. Diomande er sjálfur opinn fyrir því að fara frá Leipzig í glugganum.

Olise er aðeins flóknara dæmi en hann er ánægður með lífið hjá Bayern sem hefur engan áhuga á að selja. Hann kostaði Bayern 50 milljónir punda árið 2024.

EInhverjir miðlar halda því fram að Olise sé með klásúlu sem virkjast í sumarglugganum en Max Eberl, yfirmaður íþróttamála hjá Bayern, hefur harðneitað að slíkt ákvæði sé í samningnum.

Það þyrfti því verulega háa upphæð til að sannfæra Bayern um að selja Olise en sú upphæð gæti verið 100 milljónir punda eða meira, miðað við það sem hefur verið sagt í fjölmiðlum.

Diomande hefur komið að sautján mörkum með Leipzig á leiktíðinni en Olise komið að 38 mörkum með Bayern.