Romagnoli líklegri til að velja Lazio heldur en Fulham
Romagnoli tók við fyrirliðabandinu af Leonardo Bonucci. Hann hafði áður leikið fyrir Roma og Sampdoria.
Mynd: Getty Images
Romagnoli tók við fyrirliðabandinu af Leonardo Bonucci. Hann hafði áður leikið fyrir Roma og Sampdoria.
Mynd: Getty Images
Ítalski fréttamaðurinn Alfredo Pedullá er mikils metinn og starfar meðal annars fyrir La Gazzetta dello Sport.
Hann greinir frá því að Lazio hafi ákveðið að blanda sér í baráttuna um Alessio Romagnoli, fyrrum fyrirliða AC Milan sem er fáanlegur á frjálsri sölu í sumar.
Romagnoli er aðeins 27 ára gamall en búinn að missa sæti sitt í byrjunarliði Milan. Hann rann út á samningi um mánaðarmótin og er því frjáls ferða sinna.
Fulham hefur sýnt Romagnoli áhuga en Lazio gæti verið líklegri áfangastaður fyrir þennan miðvörð sem á 12 leiki að baki fyrir ítalska landsliðið, eftir að hafa verið lykilmaður í yngri landsliðunum.
Romagnoli vill spila í Evrópudeildinni og er ekki talinn sérlega áhugasamur um að flytja til Englands. Hjá Lazio myndi hann berjast við Luiz Felipe og Francesco Acerbi um byrjunarliðssæti í hjarta varnarinnar.
