„Ég er mjög ánægður með sigurinn, þetta var baráttuleikur og við þurftum að hafa mikið fyrir þessu og ég er bara ánægður að hafa náð að klára þetta." sagði Jóhann Birnir Guðmundsson þjálfari ÍR eftir sigurinn á Þrótti í kvöld og er ÍR komið á toppinn í Lengjudeildinni.
Lestu um leikinn: ÍR 2 - 1 Þróttur R.
„Að sjálfsögðu er það planið að reyna byrja að krafti, þetta gat varla byrjað betur fyrir okkur. Mér fannst samt fyrsta korterið þrátt fyrir að við höfum náð að skora þarna í fyrstu sókn að þá lögðumst við aðeins of mikið niður en svo unnum við okkur vel inn í leikinn og fengum þrjú til fjögur mjög góð færi til að komast í 2-0 en Þróttararnir eru með gott lið og þetta var bara erfiður leikur."
Óðinn Bjarkarson skoraði sigurmark leiksins og Jóhann Birnir hrósaði honum eftir leikinn í kvöld.
„Mjög gaman að sjá Óðinn skora, hann er búin að vera hóta þessu allt tímabilið og bara frábært að sjá hann skora. Hann kom léttur og ferskur inn í þetta, geggjaður peyi og gaman að sjá hann setja hann svona" sagði Jói um Óðinn sem var nýkominn úr útskriftarferð.
Jóhann Birni fannst liðið leggjast niður eftir að liðið komst yfir en það var ekki ætlunin.
„Við ætluðum ekkert að gera það en þeir kannski pinna okkur niður. Þeir eru náttúrlega bara fínir í fótbolta og vel drillað lið, sérstaklega á boltanum, náðu að spila honum og náðu að spila honum inn í þessi svæði sem varð til þess að við þurftum aðeins að falla niður en um leið og við náðum að stíga aðeins upp á þá fannst mér við vera með stjórnina."
Þróttur Reykjavík jafnaði snemma í síðari hálfleik og Jóhann Birnir var ánægður með karakterinn í sínu liði að ná að svara því og vinna leikinn.
„Mikill karakter í liðinu, samsetningin á liðinu er þannig, þetta eru mjög flottir strákar sem leggja allt í þetta og við erum bara ánægðir."
