Oscar, sem er 33 ára gamall, spilaði með Internacional og Sao Paulo áður en hann samdi við Chelsea árið 2012.

Þar spilaði hann í fimm ár og var í uppáhaldi margra en hann lék 203 leiki og kom að 69 mörkum á tíma sínum þar. Á þessum tíma vann hann ensku úrvalsdeildina tvisvar, Evrópudeildina og deildabikarinn.

Brasilíumaðurinn tók það óvænta skref að fara til Kína í janúar árið 2017. Á þessum tíma voru margir leikmenn að horfa til Kína, sem bauð leikmönnum fúlgur fjár til að spila í landinu.

Margir entust ekki lengi þar en Oscar hefur haldið tryggð sína við Shanghai í sjö ár og verið þeirra langbesti leikmaður.

Á þessu tímabili skoraði hann 14 mörk og gaf 24 stoðsendingar er Shanghai varð deildarmeistari og þá hjálpaði hann liðinu að vinna bikarinn.

Oscar vann deildina þrisvar sinnum á sjö árum ásamt því að vinna bikarinn og Ofurbikar Kína. Í gær brast hann í grát í kveðjuleik sínum með félaginu en samningur hans rennur út um áramótin og er hann tilbúinn að takast á við nýjar áskoranir.

Samkvæmt erlendum miðlum hafa Flamengo, Internacional og Sao Paul öll áhuga á að fá hann en bandaríska félagið Los Angeles FC er einnig í baráttunni.

Shanghai Port hefur boðið honum nýjan samning en hann myndi aðeins þéna 3 milljónir evra í árslaun. Á þessum sjö árum hans í Shanghai þénaði hann rúmar 200 milljónir evra og var einn launahæsti leikmaður heims.

Launaþak var sett á kínversku deildina árið 2020 og getur því Shanghai ekki boðið honum hærri laun. Samkvæmt brasilískum miðlum mun hann ekki samþykkja boðið og kvaddi hann því stuðningsmenn félagsins í gær.

Oscar spilaði 48 A-landsleiki og skoraði 12 mörk á landsliðsferli sínum með Brasilíu. Hann fór með liðinu á HM 2014 en hefur ekki verið valinn í hópinn síðan 2016.