„Ég er heilt yfir nokkuð ánægður með spilamennskuna. Mér fannst við ekki alveg nægilega góðir á boltann í fyrri hálfleik en samt fínn hálfleikur heilt yfir. En frábær seinni hálfleikur. Það er það sem við þurfum að taka út úr þessum leik," sagði Davíð Smári Lamude, þjálfari Vestra, eftir tap gegn Val á Ísafirði í dag.
Lestu um leikinn: Vestri 0 - 2 Valur
„Það lýsir sér best í því að ef dómarinn dæmir aukaspyrnu á Cafu þá á hann auðvitað að fá gult spjald fyrir dýfu. Þetta er bara rangur dómur og ekki sá eini í dag. Mikið af litlum brotum sem virtust fara svolítið í hina áttina," sagði Davíð Smári.
„Svo er það þetta stóra atvik sem kemur okkur í 1-1 stöðu, það er ofboðslega sorglegt. Það er bara einu sinni þannig að við vissum það farandi inn í tímabilið, sérstaklega gegn liði eins og Val sem er með stóra og langa sögu að þá er oft svona sjálfkrafa. Við þurfum bara að vera gíraðir í það, höfum rætt það síðan í janúar að við þurfum að hafa mikið fyrir hlutunum," sagði Davíð Smári.
Næsti leikur Vestra er gegn Fram í undanúrslitum Mjólkurbikarsins eftir slétta viku. Fari liðið áfram verður Valur einmitt andstæðingurinn í úrslitum. Davíð Smári var með ákall til stuðningsmanna Vestra.
„Það er ný keppni, við höfum unnið gríðarlega hart að því að koma okkur þangað, unnið stóra sigra gegn sterkum andstæðingum. Eins ákall til stuðningsmanna að styðja okkur í blíðu og stríðu, setja smá standard þar."
„Við þurfum að troðfylla stúkna, þurfum á öllum að halda. Við erum ein heild. Stuðningsmenn voru að kalla eftir betri frammistöðu gegn Val í dag, ég heyrði það úr stúkunni og það gleður mig. Við erum komnir það langt að stuðningsmenn Vestra eru farnir að krefjast þess að við vinnum Val og það gleður mig. Það veitir manni stollt að við erum komnir alla leið þangað. Ég held að hljóti að gefa líka leikmönnum kraft að það eru kröfurnar," sagði Davíð Smári.
Athugasemdir
