„Hann hefur verið mjög góður hjá Midtjylland sem er toppliðið í Danmörku," sagði Erik Hamren, landsliðsþjálfari, á fréttamannafundi í dag.

„Hann hefur spilað virkilega vel. Hann er áhugaverður leikmaður sem ég bind miklar vonir við í framtíðinni. Það verður áhugavert að vinna með honum."

Aðspurður af hverju Mikael er tekinn núna upp í aðalliðið og valinn í hópinn frekar en að spila með U21 liðinu sagði hann: „Við þurfum á honum að halda. Aðalliðið er alltaf fyrsti kostur. Hann er góður leikmaður og hefur áhugaverða hæfileika," sagði Hamren sem segir að Mikael gæti fengið tækifærið í komandi leikjum.

„Allir sem eru valdir eru tilbúnir að spila. Við veljum engan til að vera númer 23 í hópnum. Allir þurfa að vera tilbúnir að spila. Við völdum hann af því að við teljum að hann geti spilað. Það er á hreinu," sagði Hamren.

Mikael er 21 árs gamall en hann spilaði sinn fyrsta A-landsleik með Íslandi í vináttuleik gegn Indónesíu í janúar 2018.