Kalvin Phillips er búinn að framlengja samning sinn við Leeds til sumarsins 2024. Þetta eru frábærar fregnir fyrir félagið enda sýndu úrvalsdeildarliðin Burnley og Aston Villa honum áhuga í sumar.
Phillips er 23 ára miðjumaður sem vann sér inn byrjunarliðssæti hjá Leeds fyrir þremur árum. Hann hefur spilað 145 leiki fyrir félagið.
Leeds hefur verið í harðri baráttu um að komast aftur í ensku úrvalsdeildina undanfarin misseri en núna virðist loks vera komið að því.
Marcelo Bielsa er búinn að móta hópinn að sinni hugmyndafræði og er Leeds með 13 stig eftir 6 fyrstu umferðirnar. Liðið tapaði óvænt gegn Swansea í síðustu umferð, þar áður hafði liðið unnið fjóra og gert eitt jafntefli.
Athugasemdir
