Karim Benzema skoraði í 2-0 sigri Real Madrid gegn Eintracht Frankfurt í úrslitaleik Ofurbikars Evrópu í gærkvöldi.
Þetta var 324. mark Benzema fyrir félagið og er hann þar með orðinn næstmarkahæsti leikmaður í sögu þess, með einu marki meira heldur en spænska goðsögnin Raúl.
Hinn 34 ára gamli Benzema, sem verður 35 ára í desember, er þó enn langt frá markameti Cristiano Ronaldo og mun líklegast aldrei jafna það. Ronaldo skoraði 450 mörk á tíma sínum hjá Real Madrid - í 438 leikjum. Ótrúleg tölfræði.
Thibaut Courtois varði mark Real í úrslitaleiknum og hélt hreinu. Þetta var fjórði úrslitaleikur Courtois með Real innan Evrópu og hefur honum tekist að halda hreinu í öllum fjórum leikjunum.
Í þessum fjórum leikjum varði Courtois 19 skot og var sérstaklega mikilvægur í úrslitaleik Meistaradeildarinnar gegn Liverpool í sumar.
Ekki er talið með úrslitaleik HM félagsliða sem Real Madrid vann 4-1 í desember 2018.
100% - Thibaut Courtois 🇧🇪 has saved all 19 shots on goal he has faced from opposition players in his four finals with @realmadriden in domestic and UEFA competitions. Essential. pic.twitter.com/B6K3f2oQFl
— OptaJose (@OptaJose) August 10, 2022
