Eins og fram hefur komið er áætlað að íslenski boltinn fari aftur af stað á föstudaginn. Í dag fundaði KSÍ með forráðamönnum félaga í Pepsi Max- og Lengjudeildinni.

Þar var farið yfir þær kröfur sem félögin þurfa að uppfylla við framkvæmd leikja. Áhorfendur verða ekki leyfðir og þá verður 2 metra reglan í gildi í öllum tilfellum nema í leiknum sjálfum.

Leikmenn mega ekki heilsast og þá var sérstaklega tekið fram á fundinum að bannað verður að snertast þegar mörkum er fagnað. Lukkukrakkar og liðsmyndir eru einnig á bannlista.

Boltasækjarar á leikjum verða fjórir og þeir verða að vera 16 ára eða eldri. Boltar eru sótthreinsaðir og verða staðsettir rétt fyrir utan leikflötinn og sækja leikmenn þá sjálfir.