England: Brentford skellti Man Utd

Erik ten Hag fer ekki vel af stað við stjórnvölinn hjá Manchester United þar sem félagið er búið að tapa tveimur fyrstu keppnisleikjunum á tímabilinu.

Rauðu djöflarnir töpuðu gegn Brighton á Old Trafford í fyrstu umferð og í dag heimsóttu þeir Brentford í leik sem einkenndist af hrikalegum mistökum og slæmri spilamennsku Man Utd.

David de Gea gaf andstæðingunum fyrst tvö mörk leiksins. Fyrst missti hann veikburða skot Josh Dasilva undir sig og í netið og svo gaf hann fáránlega erfiða sendingu á Christian Eriksen sem var undir stífri pressu frá Mathias Jensen. Jensen stal boltanum og tvöfaldaði forystu Brentford.

Ben Mee gerði þriðja mark heimamanna eftir hornspyrnu og skoraði Bryan Mbeumo svo eftir vel útfærða skyndisókn. Staðan var 4-0 eftir ótrúlegan fyrri hálfleik.

Frammistaða United skánaði ekki sérstaklega mikið í seinni hálfleik, De Gea hætti að gefa mörk en sóknarleikur liðsins var ekki uppá marga fiska og héldu heimamenn í Brentford markinu hreinu.

Lokatölur 4-0 og er Brentford með fjögur stig eftir jafntefli við Leicester í fyrstu umferð.

We are bottom….I’m going off grid

— Rio Ferdinand (@rioferdy5) August 13, 2022