Óli er ekki mikið að fikta í Excel að eigin sögn
„Þetta var hörkuleikur,“ sagði Ólafur Jóhannesson, þjálfari Vals, eftir 0-0 jafntefli gegn KR í kvöld. „Ég er ánægður með frammistöðu minna manna og sáttur með stigið. Valur er með fjögur stig eftir leiki sína við KR í deildinni og var Óli ánægður með það. „Ég bý aldrei til Excel skjal. En ég er ánægður með að vinna þá heima og fá jafntefli á útivelli. Það á að vera farsæl leið.“
Lestu um leikinn: KR 0 - 0 Valur
Stjarnan gerði jafntefli í kvöld og náði því ekki að minnka forskot Valsmanna. Það stóð ekki á svörum þegar Óli var spurður út í það. „Mér er svo sem alveg sama hvað hinir gera. Ég er ánægður með að fá stigið. Við erum að spila á erfiðum útivelli við mjög gott lið og ég fagna því að fá stig hér.“
Völlurinn var blautur og var Þorvaldur Árnason á milli tannanna á fólki enda fullt af hasar í kappsmiklum leik. „Mér fannst gott tempó hjá báðum liðum og dómarinn mjög góður. Hann leyfði leiknum að fljóta í svona flestum tilfellum. Þannig að þetta var bara hörku leikur tveggja liða sem voru að berjast og mikið undir. Hvorugt lið vildi gefa færi á sér og þá fer oft 0-0. Þetta eru Reykjavíkurrisar og dómarinn dæmdi mjög vel.“
Mætingin var nokkuð góð í kvöld en 1648 manns mættu á Alvogen völlinn til að sjá einmitt þennan risa Reykjavíkurslag. „Ég er að minnsta kosti ánægður með mína menn í Val. Við höfum fengið fínan stuðning í sumar og ég hvet alla Valsmenn til að halda áfram að styðja okkur. KR-ingar fengu líka fullt af fólki en þeir hafa örugglega bara komið til að horfa á okkur,“ sagði Óli sposkur í lokin.
