Valskonur byrjuðu mun betur og fóru með sanngjarna 1-0 forystu inn í hálfleikinn.

Jordyn Rhodes skoraði markið á 39. mínútu með skoti sem fóru af Telmu Steindórsdóttur og í netið.

Stuttu eftir markið gat Fanndís Friðriksdóttir tvöfaldað forystuna er hún mætti fyrirgjöf Bryndísar Eiríksdóttir en stýrði boltanum í stöng og þurfti Valur að sætta sig við eins marks forystu í hálfleik.

Í þeim síðari náðu Framarar að snúa taflinu við. Una Rós Unnarsdóttir jafnaði metin með skoti úr þröngu færi á 53. mínútu og tíu mínútum síðar átti Sara Svanhildur Jóhannsdóttir skot í þverslá.

Framarar héldu áfram að sækja og kom sigurmarkið nokkrum mínútum seinna er Murielle Tiernan keyrði upp völlinn með þrjár Valskonur í sér og skoraði með góðu skoti. Sjöunda mark hennar í deildinni og er hún nú næst markahæst.

Dominiqe Evangeline Bond-Flasza fékk algert dauðafæri til að tvöfalda forystuna er Tinna Brá Magnúsdóttir átti slaka sendingu frá marki, en Dominique setti boltann í stöng.

Valskonur náðu ekki að svara og lokatölur 2-1 Fram í vil. Framarar eru áfram í 5. sæti og nú með 15 stig, en Valur í sætinu fyrir neðan með 9 stig og án sigurs í síðustu sex deildarleikjum sínum.

Víkingar kláruðu FHL í seinni hálfleik

Víkingur vann langþráðan 4-0 stórsigur á FHL í botnslag í Fjarðabyggðarhöllinni.

Víkingar höfðu ekki unnið leik síðan í annarri umferðinni og var vonin sú að ná að skapa smá meðbyr með því að taka sigur fyrir austan.

Það var líf og fjör í fyrri hálfleiknum en engin mörk. Víkingar sóttu án afláts í byrjun leiks en FHL náði að koma aðeins meira jafnvægi eftir rúmar tíu mínútur.

Freyja Stefánsdóttir var hættuleg í sóknarleik Víkinga á meðan Calliste Brookshire var kraftmikil hjá heimakonum.

Staðan engu að síður markalaus í hálfleik en í þeim síðari kom fimmtán mínútna kafli sem FHL-liðið vill líklega gleyma sem allra fyrst.

Bergdís Sveinsdóttir, fyrirliði Víkings, skoraði á 66. mínútu. Freyja fékk boltann vinstra megin, kom honum inn á Bergdísi sem skoraði af stuttu færi og rúmri mínútu síðar bætti Linda Líf Boama við öðru eftir undirbúning Freyju.

Dagný Rún Pétursdóttir skoraði þriðja markið eftir klaufagang í vörn FHL. Freyja náði til boltans og átti sendingu á Lindu en Keelan Terrell sá við henni. Dagný mætti í frákastið og eftirleikurinn auðveldur.

Fjórða og síðasta mark leiksins kom síðan á 80 mínútu. Bergdís átti sendingu sem fór af Hrafnhildi Eik Reimarsdóttur og í eigið net. Fimmtán mínútna martröð hjá heimakonum.

Hrikalega slæmur kafli og unnu Víkingar þægilegan sigur sem fleytir þeim í 7. sæti með 7 stig en FHL áfram án stiga á botninum.

Úrslit og markaskorarar:

Valur 1 - 2 Fram
1-0 Jordyn Rhodes ('39 )
1-1 Una Rós Unnarsdóttir ('54 )
1-2 Murielle Tiernan ('65 )
Lestu um leikinn

FHL 0 - 4 Víkingur R.
0-1 Bergdís Sveinsdóttir ('66 )
0-2 Linda Líf Boama ('68 )
0-3 Dagný Rún Pétursdóttir ('72 )
1-3 Hrafnhildur Eik Reimarsdóttir ('80 , sjálfsmark)
Lestu um leikinn