Tufa um rauða spjaldið: Okkur á bekknum fannst hann hlaupa á Bjarna og henda sér niður
Mynd: Fótbolti.net - Hafliði Breiðfjörð
Mynd: Fótbolti.net - Hafliði Breiðfjörð
„Mér líður ekki vel. Þegar þú tapar leik þá líður þér aldrei vel við vorum sjálfum okkur verstir í kvöld," sagði Srdjan Tufegdzic þjálfari Vals eftir tapið á Samsungvellinum í Garðabæ í kvöld.
Stjarnan byrjaði leikinn gríðarlega vel og komst yfir og þá vöknuðu gestirnir í Val til lífs og Tufa var ekki ánægður með byrjunina á leiknum í kvöld.
„Ég er búinn að ræða þetta mjög mikið í vikunni. Stjarnan er besta liðið í deildinni hvernig þeir byrja leiki og sérstaklega hérna á Samsungvellinum og við einhverneigin náum engum svörum við þeirra byrjun en við náðum bara ekki að svara þeim."
Bjarni Mark Duffield hjá Val fékk beint rautt spjald tveimur mínútum eftir að Patrick Pedersen minnkaði muninn í 3:2 og það hægði á Valsmönnum. Bjarni Mark Duffield var einnig sendur í sturtu með beint rautt spjald í leik þessara liða á síðustu leiktíð á Samsungvellinum.
„Ég hef ekki séð atvikið aftur en okkur á bekknum fannst Örvar hlaupa á Bjarna og henda sér niður. Þeir gerðu það oft í leiknum. Þeir voru að biðja um víti og annað en ég þarf að sjá þetta betur. Ég ræði yfirleitt ekki um dómarana en þeir voru of mikið að henda sér niður og vonandi hætta þeir því í næsta leik.“
Patrick Pedersen lék sinn 200 leik fyrir Val í kvöld og skoraði bæði mörk Vals í kvöld. Hann er kominn með ellefu mörk í ellefu leikjum á tímabilinu og 127 mörk í efstu deild. Hann er aðeins fjórum mörkum frá Tryggva Guðmundssyni, markahæsta leikmanni efstu deildar frá upphafi.
„Það er heiður fyrir mig að þjálfa manneskju og leikmann eins og Patrick. Hann gerir allt 100 prósent og þá uppsker maður yfirleitt. Hann er mikill Valsmaður. Ég tek hatt minn ofan fyrir honum,“ sagði Túfa.
