Andy Robertson
Skoski landsliðsfyrirliðinn Andy Robertson er efstur á óskalista Atlético Madríd fyrir vinstri bakvarðarstöðuna í sumarglugganum.
Robertson hefur verið á mála hjá Liverpool frá 2017 og var með bestu vinstri bakvörðum heims undir stjórn Jürgen Klopp.
Liverpool er að ganga frá kaupum á Milos Kerkez frá Bournemouth og fær því Robertson meiri samkeppni um stöðuna.
Fabrizio Romano segir að spænska félagið Atlético Madríd sé með Robertson efstan á óskalista sínum í bakvarðarstöðuna, ofar en Theo Hernandez sem er á mála hjá AC Milan.
Það gæti hins vegar reynst erfitt fyrir Atlético að fá Robertson sem er enn í miklum metum hjá Liverpool.
Samkvæmt Romano er Robertson sjálfur opinn fyrir því að fara til Atlético.
Robertson, sem er 31 árs gamall, á 342 leiki og 11 mörk að baki með Liverpool og unnið átta titla.
Athugasemdir
