„Mér fannst við kannski ívið sterkari í fyrri hálfleik, við vorum að djöflast og þræla þeim út. Svo var pústið búið hjá okkur og þeir gengu á lagið," sagði Hallur Hallsson, fyrirliði Þróttar, eftir 4-1 tap gegn Víkingi á Reykjavíkurmótinu í kvöld.
„Mér fannst bæði lið hlaupa, berjast og reyna að spila boltanum þegar það átti við. Heilt yfir fínn leikur, miklu betri en síðasti leikur allavega. Það var eitthvað bras á okkur þar eftir jóalfríið en það er búið," sagði Hallur en hann var þar að tala um 0-0 jafntefli gegn KV síðasta föstudag.
„Allir sem spiluðu leikinn og komu inn gáfu sig 100% í þetta. Við erum að prófa nýja hluti með nýjum þjálfara og eðlilegt að þetta rúlli ekki smurt strax í byrjun."
Englendingurinn Gregg Ryder tók við þjálfun Þróttar en hann er fæddur 1988 og er því átta árum yngri en Hallur. Hvernig finnst honum að hafa svona ungan þjálfara?
„Það er allt í góðu, ég er svo kornungur sjálfur," sagði Hallur kíminn. „Hann er með sínar áherslur og þetta er aðeins öðruvísi en þessir Íslendingar sem við höfum haft. Það mun taka okkur smá tíma að þróa okkar leik eins og hann vill hafa hann."
Viðtalið má sjá í heild sinni í sjónvarpinu hér að ofan.
