Njarðvík var með fjögurra stiga forystu á toppnum fyrir þessa umferð en sú forysta er nú komin niður í tvö stig.

Leikurinn byrjaði ágætlega hjá Njarðvíkingum sem tóku forystuna á 12. mínútu er Sigurjón Már Markússon skallaði hornspyrnu Arnleifs Hjörleifssonar í netið.

Á síðustu mínútum fyrri hálfleiks fengu heimamenn tvö högg á stuttum tíma. Kári Kristjánsson hamraði boltanum í netið á 42. mínútu og mínútu síðar kom Aron Snær Ingason gestunum í forystu.

Njarðvíkingar voru fljótir að svara í byrjun síðari er Freysteinn Ingi Guðnason skallaði fyrirgjöf Oumar Diouck í netið, en Þróttarar svöruðu um hæl með marki Viktors Andra Hafþórssonar sem lét vaða í fjærhornið.

Heimamenn reyndu hvað þeir gátu að finna jöfnunarmark og fengu svo sannarlega færin til þess, en það kom aldrei og Þróttur því fyrsta liðið sem tekst að vinna Njarðvíkinga í sumar! Njarðvík er áfram á toppnum með 37 stig en nú eru Þróttarar komnir upp í 2. sætið með 35 stig.

Sex marka jafntefli í Kórnum

HK og Grindavík skildu jöfn, 3-3, í svakalegum markaleik í Kórnum.

Grindvíkingar byrjuðu betur og var það Adam Árni Róbertsson sem tók forystuna fyrir gestina á 11. mínútu en eftir það varð leikurinn að eign HK sem óð í færum.

Dagur Orri Garðarsson jafnaði metin eftir klafs í teignum og gátu HK-ingar vel bætt við fram að fyrri hálfleik, en staðan 1-1 þegar liðin gengu til búningsherbergja.

Grindvíkingar komust aftur í forystu snemma í síðari hálfleik er Árni Salvar Heimisson og Rúrik Gunnarsson tóku þríhyrningsspil áður en Árni afgreiddi boltann í netið.

Adam Árni bætti við öðru marki sínu í leiknum stuttu síðar er hann fór illa með Þorstein Aron Antonsson og hamraði boltanum í þaknetið.

HK-ingar náðu að bjarga andliti undir lok leiks. Jóhann Þór Arnarsson minnkaði muninn á 85. mínútu og þá bætti Þorsteinn Aron upp fyrir varnarmistök sín fyrr í leiknum með flottu skallamarki í uppbótartíma.

Seint í uppbótartímanum fékk Aron Kristófer Lárusson að líta sitt annað gula spjald fyrir að rífa Harald Björgvin Eysteinsson niður og var Hermanni Hreiðarssyni, þjálfara HK, einnig sýndur reisupassinn fyrir mótmæli.

Lokatölur 3-3 í bráðskemmtilegum leik í Kórnum. HK er í 5. sæti með 31 stig en Grindavík í 8. sæti með 18 stig.

Góður útisigur Fjölnis

Fjölnir vann Selfoss, 2-1, á JÁVERK-vellinum á Selfossi.

Fjölnismenn fengu gefins mark á 22. mínútu er Daði Kárason átti slaka sendingu til baka sem Orri Þórhallsson komst inn í, lék á Robert Blakala í markinu og skoraði.

Daníel Ingvar Ingvarsson bætti við öðru fyrir Fjölni átta mínútum síðar. Hann fékk að hanga á boltanum fyrir utan teig og ákvað að láta bara vaða og í netið fór boltinn.

Selfyssingurinn Jón Daði Böðvarsson minnkaði muninn fyrir heimamenn á 34. mínútu eftir sendingu Ívans Breka Sigurðssonar og leikurinn galopinn.

Bæði lið fengu færin til að skora í þeim síðari en fleiri urðu mörkin ekki og Fjölnismenn sem taka mikilvægan sigur með sér heim. Fjölnir er í 11. sæti með 15 stig en Selfoss í 9. sæti með 16 stig.

Stórsigur Fylkis

Fylkismenn unnu 4-0 stórsigur á Keflavík á Tekk-vellinum í Árbæ.

Arnór Breki Ásþórsson skoraði fyrsta mark Fylkis á 32. mínútu eftir geggjaðan undirbúning Emils Ásmundssonar sem lék á nokkra leikmenn áður en hann þræddi boltann inn á Arnór sem tók við boltanum og setti hann síðan af öryggi í netið.

Heimamenn gerðu út um leikinn í síðari hálfleiknum. Varamaðurinn Benedikt Daríus Garðarsson átti svakalega innkomu og skoraði tvö mörk á nokkrum mínútum.

Fyrra markið var einkar glæsilegt með hálfgerðu snúningsskoti meðfram grasinu og í netið áður en hann gerði annað markið með góðri afgreiðslu. Nikulás Val Gunnarsson lagði upp bæði mörkin fyrir Benedikt.

Guðmundur Tyrfingsson rak síðasta naglann í kistu Keflavíkur. Pablo Aguilera var með boltann vinstra megin, kom honum inn á teig á Guðmund sem þurfti ekki annað en að rúlla boltanum í netið.

Stórsigur Fylkis staðreynd sem er þó áfram í botnsætinu með 14 stig. Gríðarlega mikilvægt fyrir síðustu umferðirnar og möguleikinn á að halda sér uppi raunverulegur. Keflavík er í 6. sæti með 28 stig.

Njarðvík 2 - 3 Þróttur R.
1-0 Sigurjón Már Markússon ('12 )
1-1 Kári Kristjánsson ('42 )
1-2 Aron Snær Ingason ('43 )
2-2 Freysteinn Ingi Guðnason ('46 )
2-3 Viktor Andri Hafþórsson ('48 )
Rautt spjald: Arnar Freyr Smárason, Njarðvík ('86) Lestu um leikinn

HK 3 - 3 Grindavík
0-1 Adam Árni Róbertsson ('11 )
1-1 Dagur Orri Garðarsson ('26 )
1-2 Árni Salvar Heimisson ('54 )
1-3 Adam Árni Róbertsson ('67 )
2-3 Jóhann Þór Arnarsson ('85 )
3-3 Þorsteinn Aron Antonsson ('95 )
Rautt spjald: Aron Kristófer Lárusson, HK ('98) Lestu um leikinn

Selfoss 1 - 2 Fjölnir
0-1 Orri Þórhallsson ('22 )
0-2 Daníel Ingvar Ingvarsson ('30 )
1-2 Jón Daði Böðvarsson ('34 )
Lestu um leikinn

Fylkir 4 - 0 Keflavík
1-0 Arnór Breki Ásþórsson ('32 )
2-0 Benedikt Daríus Garðarsson ('68 )
3-0 Benedikt Daríus Garðarsson ('70 )
4-0 Guðmundur Tyrfingsson ('73 )
Lestu um leikinn